Dt May 31st, 2012 (Thursday), Dar
11:00 a.m. hian Mizoram UPC Pastor, Bazar Bialtu Rev. F.Rothianga Pension
thlahna chu Mizoram UPC General Headquarters Conference Hall-ah hman a ni. He
inkhawm tawi hi Rev. H.Vanlaltlana, General Supdt., Mizoram UPC in kaihhruai
in, Rev. K.Lalfamkima, Chawlhhmun Bialtu in hunserh a hmang a, Rev.
F.Rothianga, Rev. Thangliansanga, General Secretary, Mizoram UPC, Upa
K.Zoramthanga, Rev Chalhuaia leh Rev Saihnuna ten thu an sawi bawk. Thlahna thilpek Rev. R.Lalthantluanga, General
Treasurer, Mizoram UPC in a hlan a, Rev. Vanlalfela Sailo, Chaltlang Bialtu
chuan malsawm tawngtaiin hun tawp a siam a ni.
A AI AWH TURIN :
Hetia Bazar Bialtu Pastor a Pension hnu hian Dt. 11th June 2012 hian General
Pastor Board chu an thu khawm dawn a, chumi hma Bazar Bial lo awp turin General
Superintendent Rev. H. Vanlaltlana a ni ang.
REV.F.ROTHIANGA CHANCHIN TLANGPUI
Rev.F.Rothianga hi a pa chu Pasena a
ni a, Aiduzawl khuaah May 7, 1947 khan a lo piang a. Pawl ruk thleng lehkha
zirin, kum 1958-ah Aiduzawl khuaah Evan.Chalkhuma kutah Isua hmingin baptisma a
chang a. Unaunu Khuangliantiali nen inneiin fapa 4 leh fanu 1 an nei a, a nupui
Unaunu Khuangliantiali hian kum 2010 khan a boralsan a ni.
Kum 1995 ah Ordination Licence pek a
ni a, Apostolic Theological Institute a tangin kum 1999 khan a Graduate bawk.
A service hi April 1, 1995 atanga
tanin Pastor hna hi a thawk a, kum 17 chhung a thawk a ni. A tir berah Rabung
bialah dah a niin, Rabung bialah hian kum 2 a awm a. Jan 15, 1997 atangin
Khawzawl bialah a awm leh a, kum 5 a awm hnuin, Jan.16, 2002 atangin Keifang
bialah a awm leh a, hetah hian kum 5 a awm leh a. Jan 15, 2007 atangin
Bethlehem bialah sawn a ni a, hetah hian kum khat chiah a awm hman a, General
Superintendent-ah thlan a niin Term khat kum 2 (2008-2009) chhung General
Superintendent-ah a awm a ni. Jan. 1, 2010 atangin tuna a awmna Bazar bialah
hian a awm leh a; hetah hian kum 2½ awmin, June 1, 2012 hian Pension-in min lo
chhuahsan dawn ta a ni. Rev. F.Rothianga hi mi fimkhur, thil ti mai mai lo mi,
dik taka thil tih duh mi a niin, hun vawn dik kawnga entawn tlak, tlai duh hauh
lo mi a ni. Bial a enkawlnaah pawh harsatna engmah tawk ngai lo mi a ni a.
General Superintendent a nih lai pawhin Pathian malsawmna a dawng hle a; tuna
General Headquarters Office hmunhma pawh hi a hun laia lei leh sak chhoh a ni
nghe nghe. Thlarau mi leh rawngbawltu chhuanawm, entawn tlak tak a ni a.
Hetianga min lo chawlhsan mai tur hi kan ui em em a. Pension pawhin lo chhuak
se, kohhran mi duh lai a ni tih hre rengin, kohhran tan a tangkai thei ang bera
hun hmang turin kan sawmin kan ngen a ni. source : mizoramupc
If you enjoyed this post and wish to be informed whenever a new post is published, then make sure you subscribe to my regular Email Updates.
Subscribe Now!