Nangmah kha ka sawichhan che a nia…..

- Henry S.Chhuanhmingliana, 9862311550

        Mahni awm hmunah engti thei hauh silo hian kalo in sawh ve nghawng nghawng a, mahni rilru a awm pawh sawichhuak thiam hlei lo leh mite fakna aia lei hman thiamloh vanga mite huat hlawh fo thin hian eng nge maw ka han ziah ve telul ang le ? Kei aia fing leh thiamna sang tak tak neite hian han ziak ve sela hma kan sawn zawkin kan hlawkpui zawk ngei awm si a, tichung chuan ka kut chuan a thuziak lai chu a thlah thei chuang si lova, tichuan ka thuken fahrah tak mai chu... chutihruala Lalpa min pek ningeia ka hriat bawk si chu in tan, kan tan, kan zavai atan ka han hung chhuak ve leh ta phawng mai a nih hi le….

|ahhla 1:4 thu hi han chhiar teh ang. ‘Zion khawpui kawngte chu a ngui ruai, kûtpui urhsûn kal awm loh vângin; A kulh kawngkâ zawng zawng a ram zo, a puithiamte an rûm a. A nulaten an tuar a, ani lahin nâ a ti êm êm….

       Mizote mai ni lovin Kristiante hian Zion tih hi kan uarin kan hmang nasa em em mai a, Zion tih Bible-a a
lanna hmasa ber chu II Sam 5:6-9 ah a ni a, Jerusalem khawpui, tlang chhipa kulh awm Zion an tih chu Lal Davida in a lakzia te leh Davidan Jerusalem chu luahin Israel hnam inzawmkhawmte khawpui atan an hmang \hin a ni tih kan hmu a, chutiang bawkin Ringtute nunah hian Zion tih hi a tla na em em mai a, Zion tih hmanna hi kawng hrang hrangin a sawi theih a, Jerusalem khua sawi nana hmanna a awm a (Isaia 53:1), Israel mite sawi nana hman a awm bawk (Rom 9:30-33). ZION tih hi a awmzia chiang taka sawi theih a ni lova, Hebrai thumal ‘Hmun ro’ tih hi a kawk mai thei a, Arabic \awng a, ‘Tlang dung emaw Tlang chung’ an tihna a ni thei bawk tiin Bible zir mite chuan an sawi \hin. Engpawhnise, ringtute nuna pawimawhna liantak nei chu ZION hi a ni phawt mai a, chutiang bawkin Thuthlung thar ral kan kai a, Zion chuan kan thinlungah hmun chang chho zelin Lalpa chenna hmun thianghlim (Van Jerusalem thar) sawi nan Zion khawpui tihte kan hmang a, engpawhnise, Van kanaan thar sawi nan pawh miin lo hmang ta sela, a inhmeh lohna a wam chuanglo. Tun tumah pawh hian chutiang zawnga kan lo sawi anih pawhin kan hrethiam tho turah ngai ang.

Ram dung leh vanga kan Pentecost Kohhran ka thlir a, kan tualchhung kohhran ka thlir leh a, kan bialchhung ka thlir kai zel a, chutianga ngaihtuahna ka hman lai chuan inlarna emaw Pathian aw emaw ka hria chu ka ti lova, mahse, tuna ka sawi tur hi Pathian min pek ngei nia ka hriat avangin inthlahrung leh insit tak chungin inthlahrung em em chuang lovin ka han ziak chhuak ta ngawt mai dawn a nih hi. I ngaihtuah chiang dawn teh ang u hmiang…Israel fate hunlai khan ram roreltu, an lalte leh puithiam ten emaw an bawhchhiat chuan mipuiten an tuar \hin a, ram \han a ti \hu a, ral tlemte hmaah te an tlawm a, an hmelmate hmuhsit leh hnehin an awm \hin a nih kha.

      Tunlai kan ram dinhmun ka thlir a, kan bialchhung ka thlir a, chuta ka thinlunga thu lo kal lian em em mai chu…… Engvangin nge kumin hi kan bial hian harsatna neuh neuh kan tawh a, heti em em a, hma kan lak theih loh chu sawiloh hma kan sawn theih reng reng loh le, kan khawmpui neihte ka thlir let a, a bik takin Bial kohhranpui khawmpui phei kha chu…… ngaihtuahna a kal thui a, rilru \awng\aina nen mahni awm hmunah ka lo rum tlawk tlawk ringawt mai a ni. Kum chanve kan chuangkai mai dawn a, chuti chung chuan kan hmalakna hrang hrang thlir let ila, Department hrang hrang a\anga Kohhranpui thleng hian kan hmasawnna kumdang nena khaikhin chuan a sang viau lo tih a lang reng mai. Kan zoram dinhmun thlir let la, ram hruaitu, Mizoram Chief Minister a\anga MLA zahawm tak takten an bawhchhiat chuan a tuartu chu mipuite kan ni a, ram hmasawnna aiin ram kalsiam a buai a, nawrhna hrang hrang ; Kawng zawh, Chawnghei, Bandh a thleng zut mai \hin ang hian kan Kohhran dinhmun ka thlir a, kan bialchhung dinhmun nguntaka ngaihtuaha ka thlirlet hian, roreltu, puithiam dinhmuna dingmekte hi inenfiah deuh chu kan ngai a ni lo maw? Mipuite chuan bawhchhiat engmah kan neilo ka ti lo. Mahse, mipuite hmaa kal, hmahruai saktu ten kawng diklo an zawh a, an chawl emaw a nih chuan an hnunga kal mipuite tan chuan hmasawn a hardeuh dawn a ni. Kan zavaia kan inenfiah a \ul rualin a bik takin hruaitute hian in enfiah hmasak kan ngai \hin a ni. Keimah avanga Ram/Kohhan in a tuar aichuan kan insiam\hat ngam a hun ta hle mai. Chutiang a nih loh chuan kan dinhmun tur chu ngaihtuahawm tak a ni ngei ang.

        Tuna kan ram dinhmun ngaihtuah hian kan ramin Zion khawpui kan panna kawngte kan zawh fuh talo deuh em ni ang? Zion khawpui kawng lun len faitak kha tunah chuan a ramin kal ngai lohna ang maiin a \hing \huap ta mai a, kan invenna kulh kawngka tepawh a dawrawm ta hle mai zawng a nih hi. Kan khawmpui leh revival programme tehian Lalpa a tilawm tawh lova, tunhma chuan zan rei tak taka UPC ten \awnghriatloh nena Lalpa kan fak kachuan miten awm nuam an ti \hin kha a ni a, tunah chuan zan rei chu sawiloh zan dar 8 vela \awnghriatloh nena kan zai an hriatte hian an ning ngawih ngawih ta mai a nih hi.

Tunah hian Zion fate kan rum mek a, kan thinlung a mangang a, puihtu a van ruai a, kawngdiklo zawha kan kalthui hma nei hian in enlet a, Lalpa lam hawia Zion khawpui panna lamlian sial thar leh turin inbuatsaih leh teh ang u hmiang.

        In zavaiin ka sawichhan vek che u a, nangmah ngei kha a ni ka sawichhan che ni, lo in enfiah hram teh…. Pathian chuan engkim hi chhan nei \heuhin a siam a, keipawhin chhan nei lo chuan thu ka sawiin ka ziak lo a ni tih khawngaihin min lo hriatsak la, Pa in fa a hmangaih chuan a zilhau \hin a, unau kan inhmangaih chuan kan in zilhhau in kan thiamloh leh diklohna te, thupbo emaw in rel zawnga la mai lovin hmangaihna nen kan inhrilh \hin ang hian ka unate u, in zavaiin, kan zavaiin in enfiah \heuh ila, keimah ngei hi a ni mawhphurtu chu ka ni tia insiam\hat nana khua a tlai hma ngei hian inenfiah hram teh ang u.

If you enjoyed this post and wish to be informed whenever a new post is published, then make sure you subscribe to my regular Email Updates. Subscribe Now!

Kindly Bookmark and Share it: