Ni thianghlim i siam ang u

    Sunday (Pathianni) kan tih mai hi mi tam tak chuan ni thianghlim tiin an sawi mai \hin a, ka ngaihtuah neuh neuh \hin a, engvanga ni thianghlim tih nge a nih, khawi a\anga lak nge ni ang tih hian ka rilru a ti kalthui hle bawk.
    Exodus 31:14 thu kan en chuan 'Chuvângin chawlhni hi in serh tur a ni; chu chu in tân ni thianghlim a ni si a; tupawh tibawlhlawh apiang chu tihhlum ngêi ngêi tur a ni: tupawh chu mi nia hna engpawh thawk chu, chu mi chu a chipuite zîng ata tihboral tur a ni' tih kan hnu a, heta Israel fate hnena Pathianin in tan ni thianghlim a tih hi sabath ni an tih kha a ni a, chumi sabath ni chuan engmah tih/thawh phal a ni lova, mei nun phal a ni lova, hnathawh phal a ni hek lo, engmah tihphal a ni lova, awm mai mai na ni, chawlhdêrna ni a ni a, chumi ni chu thianghlim taka hman tur a ni tiin Pathian khan Mosia kaltlangin Israelte hnenah khan thu a pe a nih kha.

    Mi tam takin vawiin chawlhni thianghlim emaw ni thianghlim tiin an \awng\aina leh thusawiah te an chham \hin a, ni reng reng hi a thianghlim emaw thianghlim lo emaw Bible-ah a sawina a awmin ka hre lem lova, chawlhni thianghlim tia Bible a kan hmuh hi sabath ni thianghlim taka hman tur tiin a sawi mai ni zawkin a lang.

    Kan chawlhkar hunbi chhiar dana Thawh\an a\anga Chawlhni thleng hian ni thlianghlim a ni vek lem lova, ni thianghlim leh thianghlim lo bik pawh a awm in a lang lo bawk. A chhan chu kan khawvel hun hi a \awpin sualna chi tinrengin nitinin kan chungah thla a zar reng a, 2 Timothea 3:1 kan en chuan 'Tin, hei hi hre rawh, ni hnuhnungahte chuan hun khirh takte a lo awm ang....' kan hmuh ang hian kan tun hun hman mek hi ni hnuhnung hun a ni tawh a, chuvangin ni thianghlim kan nei thei tawhlo tiin sawi ta ila, a nih chuan engtinnge kan sawifiah tak ang le...
    Chawlhkara ni hrang hrang awmte hi ni thianghlim bik a awm lo tiin kan sawi a nih kha, chuti a nih sichuan engvanga chawlhni tehi la serh \hin nge kan nih tih chu zawhna lian tak a lo ni ta.
    Thawh\anni a\anga Chawlhni thleng hian ni thianghlim a ni tawhlo vek tiin kan sawi bawk a, a chhan chu Lalpa betute tan chuan ni thianghlim pawh  ani mahna, Mahse, misual emaw Lalpa biak nana hmang velo sualna kawng hawi zawnga ke pen te tan chuan ni thianghlim a ni thei dawn em ni? engvanga chutianga sawi ta mai nge maw kan nih le. Ni reng rengah hian thianghlim bik a awm lova, a pawimawh ber zawk chu nitina kan hun hman danah te leh kan khawsak phungah tehian Pathian duhdan anga kan nun kan hman hi a pawimawh em em a, chaklo na hrang hranga phuar vel kan ni a, keimahni kawchhungah hian sual zunzam chu a awm reng a, sual ka neilo kan ti thei lovang. Amaherawhchu, keimahnia sual awmreng chu kaihthawha a awm lohna tura kan dan thiam a \ulin a pawimawh hle. Tirhkoh Paula'n Thlarauvah awm rawh u, tichuan tisa châkna te in zawm dawn lo nia..... Tisa thiltihte chu a langfiah a ni...... (Galatia 5:16...) thu a kan hmuh ang hian tisa thiltih keimahni a\anga lo lang chhuak tur chi hrang hrangte hi tihhluma a awm theihna tur chuan Pathian Thlarau hruaia kan awm hmasak a ngai reng a ni tih i theihnghilh ngai lovang u.
    Engtin nge thlarauvah chuan kan awm reng ang a, engtin nge thlarau hruai chuan kan awm reng theih ang tih chu zawhna liantak a lo ni leh ta.
Pathian Thlarau chuan engtiklai maipawh hian min hruai a duh reng a, min hruai theihna turin hmanraw hrang hrang a hmang mai \hin a, chutihlai chuan sual keimahnia bettlat chuan hnathawh theihna tur chance a lo zawng ve char char bawk a, chumite pahnih chuan kan taksa chhungah hian in dopui an lo puang ve reng bawk a, hnehna chang thei lo ve ve in chak zawkleh chak lo zawk pawh awm chuang lovin anmahni theih ang angin hnehna chan dang kawng an ngaihtuah reng a ni. Football en \hinte chuan kan hre \heuhin a rinawm, football kan en chuan pawl pahnih ten chungnung zawk nih tumin an theihtawpin an bei ve ve a, Mahse, mi pawimawh tak pakhat a awm ve reng a, chu chu Referee a ni. Players te dikna hailang tur leh diklohna dikna hmanga rorelsak theitu chu referee a ni a, lehlam pawl offside pawh referee in a hamsak duhloh tlat chuan lehlam pawl tan chuan tihngaihna vak a awm chuang lo. Chutiang chiah chuan keimahnia sual hnathawh leh Pathian Thlarau hnathawh in do reng kara referee hna tawk tu chu keimahni hi kan ni a, kan rilru chhungril bera duhthlanna thiang tak hmang khan kan judge a ngai a, chutianga rorelna dik kan kalpui lo a nih chuan a tuartu tur chu keimahni kan ni dawn a ni tih hre reng ila, kan duhthlanna kha a diklo hlauh a nih chuan sual chuan hnehna changin keimahniah a lo lang chhuak vat mai dawn a, chutiang bawkin kan duhthlanna a dik hlauh chuan keimahniah Pathian Thlarau hnathawh chuan hnehna changin Thlarau hruaina zelin kan kal zel mai dawn a ni tih hre i hrereng ang u. Chuvangin a pawimawh ber chu kan nitin nun leh hun hman dan hi kan uluk a \ul hle.
    Ni thianghlim reng reng a awm tawh siloh chuan chawlhni kan serh/hman na chhan ber chu eng nge tih zawhna liantak awmreng mai chu...
    Thawh\an a\anga Inrinni thleng mahni eizawnna hna kan thawk a, chawlhni chuan kan chawl \hin a, chu ni chu a thianghlim bik ni lovin keimahni hian thianghlim taka kan hman \hin vang zawk a ni. Kan hman thianghlim emaw keimahni intihthianghlim nana kan hman leh siloh chuan chawlhni serh khan awmzia a nei dawn em ni? Chuvangin eng ni pawh nise, Budha sakhaw din cham pawh nise, Kristian ten Lalpa Pathian biakna hun bik atana kan hman a, amah nena inpawl nana kan hman chuan khami ni kha a lo thianghlimin NI THIANGHLIM chu a lo ni mai dawn zawk a ni.Ni thianghlim reng awm lo chu keimahni \heuh hian kan hmandan a zirin a lo thianghlim mai dawn a ni.

If you enjoyed this post and wish to be informed whenever a new post is published, then make sure you subscribe to my regular Email Updates. Subscribe Now!

Kindly Bookmark and Share it: