Mihringin Thlarau nghet tak a nei lo

     Topic dangah chuan mihring thlarau hi a thi thei em? Hrem a ni thei chiah em tih sawi a ni dawn a. Chumi hmachuan mihring hi thlarau a ni chiah em? Mihring chhungah hian a bik riaua thlarau awm a awm chiah em tih hi ngaihtuah ngai tak a ni. Zirtirna diklo tak angin lang mahse hei hi thu diklo hailanna lam a nilo, thu diklo kan pawmdan hi a ril tawh em em a. He topic ve thung erawh chu a ril lam a nilo a, tluang tlam tak, bible pawn awlsamte a a ziah a ni a. Mahse setana counterfeit avang hian rura takin keimahni ah hian thlarau ni tlata inhriatna hi a lian tawh em em a ni. Davida chuan “Aw ka nunna, eng a tinge ka chhungah i kun reng ni” a ti mai a. Hengte avang hian sermon tu tawm tak ten , “ka tisa chuan a peih a, ka thlarau erawh chuan a peih silo” te an ti leh bawk thul. Dik tak chuan keimahni chhungah hian keimahni tak tak a awm rinna hi a lian tawh em em a. KJV-in a “ramhuai pai” leh “kawchhunga ramhuai lut” alo ti mai te,“possess” tia a hman “luah” tia kan lehlin te hian mihring chhungah 3D ang deuh a thlarauin min luah run tur niin kan ngai a ni ber mai. Chu chu bible min zirtir dan a ni em? Chik ngai tak chu a ni!

MIHRING  HI TUNGE?

            Gen 2:7 ah chuan Pathianin a anpuiin mihring a siam thu kan hmu a.Hebrai ah chuan ANPUI hi  basa - lem tih  niin, English ah chuan phantom / image  tih a ni. Pathian chu thlarau a ni a, a anpui mihring erawh chu taksa neiin a siam daih thung a ni; chutichuan mihring chuan Pathian a anna lai chu topic dangah kan sawi dawn nia. Mahse Pathian an anna lai hi taksa (nephesh) hi chu a nilo phawt  a ni tih hriat erawh a tha;

Gen 3:19 ah “vaivut i ni a, vaivut ah i kir leh tur a ni”  tiin mihring (Adama) chu a hrilh a. Thuhriltu 12:7 ah chuan “vaivut chu a awm angin lei ah a kir leh a,thlarau chu a petu pathian hnenah a kir leh a ni” a ni leh bawk.

Mihring hi vaivut mai a ni tih a hriat theih ta a; khing thu te khi Pathian thunung an nih tlat avangin thlarau hi  mihring thlarau a ni tih an sawi tel reng ren lo a. Mihring hi hlarau pawh a  ni hek lo bawk!!!!

MIHRINGA THLARAU?

                Gen 2:7 ah chuan  mihring ah chuan nunna thaw a thaw lut a tih a ni; Chu thaw chu tinung tu pawh a tih theih  a (Gen 6:17).  Chutichuan taksa  chu thlarau telloin thi alo ni ta tih a ni bawk(Jakoba 2:26). Taksa chhungah chuan rilru  a awm  a, mihring chu a thih chuan a thlarauin a chhuahsan a, a ngaihtuahna pawn alo bo ve nghal bawk thin (1Korinth 2:11,Sam 146:4).Chuti anih chuan mihring ngaihtuahna te chu thlarau vang vek chu alo ni ta a; thlarau tello chuan ngaihtuahna, suangtuahna leh taksa peng te chuan hna reng an thawk theilo thin a ni ; chiang ta em em chu  thlarau tawng bul chu force, vitality, energy hi a ni ta a. Chu thaw (thlarau)  chu  Pathian thlarau  a ni tih a ni bawk a(Joba 32:8)!!  Heti zawng hian sawi ta ila life giving energy a ni zawk avangin mihringte bawhchhiatnaah hian  a tel ve reng reng lo a, bawhchhe thei pawh a ni hek lo a ! Bawhchhetu zawk chu soul, chu chu mihring zawk hi, thlarau nen a kan ngaihpawh avangin hei hi chinfel chu a har tawh thung hle a ni. Mahse energy hi hrem theih emaw, sual thei emaw lam a ni lo a. Dimension reng reng hian physical punistment an nei theilo tihna lam a ni.

             He thlarau hi mihringah a awm tlat avangin mihring chu ramsa aiin chungnung nihna alo neih phah ta em? Ni chuang lo, 3D picture anga thlarau kan suangtuah chhung chuan mihring leh ramsa danglamna hi thlarau vang ani kan ti fo ang! Thlarau tawng pakhat chu “thaw” hi a ni a. Chu chu ramsa zawng zawng pawh hian an nei vek zawk a ni. Metaphysics bih ngun tan chuan awlsam tein thlarau hi 3D lam niloin energy mai a ni tih a hriat theih a. Chu chu animal kingdom hrim hrim hian kan nei vek a ni. Mihring leh ramsa danglamna chu “thlarau” a ni tih teh fo hi zirtirna himlo leh diklo tak a ni zawk!

TLIPNA

             Zirtirna  mawlmang takah chuan  mihring  chuan amah ah thlarau neiin thlarau bawhchhe ve thei neih tir hi thil pawi tawp a ni a; taksa  tihsual  tinrengin  mihring thlarau a tihbuai phak rinna hi zirtirna bawlhhlawh a ni! Hei mai  nilo mihringte  bawhchhiatna chu  mihring thlarau bawhchhiatna a puh hi zirtirna kalh a ni bawh a, Pathian bawhchhiatna a puh nen thuhmun reng a  ni!

            Mihringah hian thlarau chu a awm ngei a; chu chu mihring thlarau tih a sawi mai thin pawh a ni. Mahse a nihna takah chuan Pathian thlarau zawk a ni a; Pathian atanga energy kan dawn ti ila a fiah ber ang chu maw! Chu chu Pathian thlarau kan hawh zawk a ni bawk a!! He energy hi nunna atana hman a nih avangin animal kingdom hian kan nei vek a; rul, mihring, misual, mifel, dragon, engpawh mai hian nunna atan an hmang zawk a ni. Chung zawng zawng chuan an thih ve leh an energy chu Pathian hnenah an pe kir leh vek tih hi thudik leh bible zirtirna him ber a ni a. Mihring hian amahin thlarau a nei reng reng lo a. Pek anih miau avangin bible hian “mihring thlarau” tiin a sawi mai zawk a ni. Mahse a bulthut zawk takah chuan “mihring hian thlarau nghet tak  a neilo” tih hi a ni!!!

 by

LT-a Chhakchhuak

If you enjoyed this post and wish to be informed whenever a new post is published, then make sure you subscribe to my regular Email Updates. Subscribe Now!

Kindly Bookmark and Share it: