Thihna Thupekah Thlarau a tel ve em?

             He topic turu tak mai han zia ve pawh hi ka insit ru khawp mai. Mahse kan bopilna a thui tawh em em si a. Khitia mizo tawnga a thupui han dah tak ngial pawh khian kan la ngaihfin tho tho hmel a! Soul leh spirit kan ngaih pawlh nasat tawh em em a vangin chinfel mai chu heta tang hian a har dawn chiang a. Mahse tlem tal a sawi rik ve na hian kawngro a su hawng mial maina tiin rinna nen sawi dawn teh ang.

               English bible a “soul” tih chu mizo bible lamah  ”thlarau” tia kan lehlin tak vek mai hi ngun taka ngaihtuah chuan thihhnu piah  zelah pawh thlarau hrang nei a, hrem leh tihnat theih rinna lian tak, setana deception turu tak mai a ni! English bible hian “soul” leh “spirit” pawh hi alo lehpawlh vel vek mai bawk nen, mizo bible-in a chianloh ang tho hian a chiang lo ve a ni ti ila a sual tam lo khawp ang.

               Greek philosopher Plato a ten mihring chu taksa, rilru leh thlarau inzawm khawm an ti mai a. Hei hi AD 40 lai vela Juda te  greek philosophy-in a hneh hunlai kha a nih a rinawm a. Paula ngei pawh hian mihring chu taksa, rilru leh thlarau inzawmkhawm angin a sawi a, tunthleng pawha Greek philosophy la nung reng a ni. A formula chu – taksa+rilru+thlarau= mihring.

          Mahse bible erawh chuan hei hi min zirtir dan a ni hauh lo. Kum BC 3000 hmalama Pathianin mihring a siam dan formula kha chu, taksa+thlarau=minung zawk a ni tlat. “Mihring chu a hnarah nunna thaw a pe a, mihring chu minung alo ni ta a ni” tih te mai hi a ni. Greek philosophy lo puakchhuah dan hi Eden huana Pathianin minung chu “in thi ang” a tih lai a, setana’n “thi lovang” tia an debate kal zel kha a nih hmel a. Pathianin mihring a siam dan hi “thi thei” in a siam a, chu chu “warning” pawh a pe lawk reng a, mahse an ei a, anlo thi ta a! Mahse an minung nihna vawilehkhata a tawp nghal thutloh avangin “thlarau lam thihna emaw nunna” nei zui ta ni a ngaihna a ni ber a. Hei hi setana bumna turu tak, bible zirtirna piahlam riruangna mai a ni!

PATHIANIN  MIHRING A SIAM DAN LEH A TIHNUN DAN

              Theologian leh pastor hrang hrang tena mihring hi thlarau nena sawifin nghal tawp mai an hrat zia hi ka ti thin. Gen 2:7 “Tin, LALPA Pathianin leia vaivutin mihring a siam a, a hnârah chuan nunna thaw chu a thaw lût a: tichuan mihring chu mi nung a lo ni ta a” tih a ni a. Mihring hi minung nih tir nghal tawp mai hi a dik lo, mihring a siam zawh hnuah minung (living soul/nephesh) a lo ni chauh zawk a ni. Minung nih nan nunna thaw(neshamah) a thaw lut a, chu thaw chu 1 Korinth 15:45 ah “Chutiang bawkin, ‘Mihring hmasa ber Adama chu mi nung a lo ni,’tih ziak a ni; Adama hnuhnung zawk chu nunna petu thlarau a lo ni a” a ti a. Thaw chu thlarau a ni ta tih Joba 33:4 ah  kan hmu ta a ni (Zakaria 12:1, Joba 27:3, Sam 104:30). Greek philosophy pawn ala pawlhdal reng reng loh Mosia ngeiin mihring chu vaivut mai  a ni tih chu hai rual loin a sawi bawk a nih kha (Thuhriltu 3:20). Mahsela chumi piah lamah chuan vaivut atanga siam mihring tinungtu erawh Pathian thaw/thlarau a ni (Joba 38:2).

THIHNA AH  HIAN  THLARAU HI  A THI VE LO

              Gen 3:19 tin, leia i kîr leh hma loh chuan i hmaia thlantui luang zawih zawihin chaw i ei tawh ang; lei atanga lâk chhuah i ni si a: vaivut i ni a, vaivutah i kîr leh tûr a ni,” .

             Mihring chu vaivut mai a nih thu kan hre ta a. Engmah thatna reng reng neilo, a tha lai ber pawh puanchhe hnangkhai tluk lo! A mawi lai ber pawh tuktin par tluk zolo a ni a. Pathianin nunna thaw a pek avangin alo nung a, minung alo ni ta chauh a ni.

                Khatia EDEN huana Pathian duhloh zawng an tiha Pathianin an chunga thil lo thleng tur a sawi “in thi tur a ni” tih ah khan minunga chu thi thei a ni tih a chiang em em a. Chu minung chu sualna avanga a thihni chuan alo chhuahna vaivutah a kir leh dawn a(Joba 34:15 ; Sam 22:19 ;  Joba 17:16), a tawih ral leh vek dawn a ni. Hei hi bible chuan “muhil” a ti a. “Muhil” hi universal issues ah reng reng muhil hlen vang vang an awm ngailo a, “muhil” hian a kentel tlat chu“tholeh tur”  tihna a ni. He vaivut hi leiah hian chatuan atan a muhil ren dawn lova, reilo te atan a muhil zawk tihna mai a ni. Chutilai chuan amaha tinungtu thlarau pawh chu khawilahah mah chalhahdamna pan emaw, chawl der der emaw turin a awm hauh lo bawk a. Thuhriltu chuan  Pathian hnenah a kir leh dawn a ni a ti zawk a ni(Thuhriltu 12:7). Tinungtu thlarau laksak a nih chuan minung chu mitthi alo ni ta tihna a ni(Sam 146:4;  Sam 104:29;Isaia 26:19;  Daniela 12:2;  Joba 7:21), mitthi chu taksa/tisa chauh hi a ni a, thlarau hi a thi ve lo a, thi thei pawh a ni hek lo a, hrem theih pawh a ni ve hek lo!

THIH HNUAH  THLARAU KHAWNGE A KAL

                  Thihnaah mihringa thlarau a thih ve tak siloh ah chuan chu thlarau chu a petu Pathian hnenah a kir leh dawn a ni;  “Joba 34:14 _15 Ama thlarau chu ahnea a lak kir a, Ama thaw chu a hnêna a lak khâwm leh chuan,  Mi nung zawng zawng an boral rual ang a, Mihring chu vaivutah a chang leh mai ang”  tiin! Mihring hian thaw hi Pathian hnen atanga dawng a ni a. Mihring thihni chu Pathian a thaw a laksak ni chu a ni,  ”I hmai i thup a, an mangang thin a; An thaw chu   i laksak a, an thi a(Sam 104:29)” tiin a inziak a. Thuhriltu ve thung chuan “Vaivut chu a awm a awm angin leiah a kir leh a, thlarau chu a petu Pathian hnenah a kir leh a( Thuhriltu 12:7 )”  tiin a inziak bawk. Mihring hi thlarau a nilo a, mihring hi vaivut mai a ni a, minung keimahni hi taksa leh thlarau inbelhbawng atanga lo insiam mai a ni.

                   Entirna atan, Radio chuan tawng nan leh zai nan bettery a mamawh a. Bettery vuah chiah khan bettery a charge awmsa  chuan energy siamin Radio chu alo tinung a. Alo zai emaw tawng ta thin a ni. Bettery a energy khan Radio a tihnun avangin  Radio a ni kan ti ngailo! Hetiang chiah hian mihring hian nunna atan energy kan mamawh ve a, chu chu thlarau mai hi a ni. Keimahni hi thlarau a nilo a, thi thei emaw, hrem thei emaw pawh a nilo! Pathian hnen atanga nunna atan a kan dawn, permanent nilo, temporary zawk a ni!

TLIPNA

                    Strong Exhausive Concordance kan en chuan; Sam 104:29 leh 146:4  a ”BREATH/THAW(7307 ruwach/ruach) hi Thuhriltu 12:7 leh Joba 34:14 a ”SPIRIT/THLARAU(7307 ruwach/ruach)” nen hian tawng thuhmun leh kawh inang an ni a.

       Gen 2:7  a “BREATH OF LIFE/NUNNA THAW( 5397 neshamah)” tih leh Joba 34:4 a “BREATH/THAW( 5397 neshamah) hi tawng thuhmun leh kawh inang alo ni leh ta a.

              Heta tanga chiang ta em em leh zirchhuah theih ta chu MIHRING chu a thih ve leh  vaivutah a chang ang a. Amaha thlarau chu Pathian hnenah a kir leh dawn a, amah (mihring) a thlarau chu Pathian ta a ni a. Chuvangin thlarau chu hrem thei emaw sual thei a ni hauhlo a. Mihring tinungtu zawk mai a ni. Chu thlarau chu a thi thei hek lo.

by

LT-a Chhakchhuak

If you enjoyed this post and wish to be informed whenever a new post is published, then make sure you subscribe to my regular Email Updates. Subscribe Now!

Kindly Bookmark and Share it: