Kan Nunna tura Thihna chu

Good Friday Isua’n Kross-a min tlanna champha a lo thlen hian kan thinlungah eng nge lo lang \hin le ? Ami hmangaihna thûkzia leh ropuizia tehi kan ngaihtuahin kan rilru hian a hre reng \hin em le? Kan mi hmangaihten kan hmangaihna leh duhsakna tehi an hriatreng loh chuan kan dem a, kan sawisel mai \hin a nih si chuan; thisen hlu taka min tlantu thihna erawh chu kan hre reng lovin kan ngaihtuah ngai lem lo fo mai! Khawvela mi huaisen leh ropui tak tak hriat theih riau lai hian chatuan nunna kan neihna Isua Krista thihna erawh kan mang nghilh fo mai em? Isua krista thihna chu an \henrualte thihna aipawhin kan ngaihlu bik chuang lo fo em? Heng zawhna tehi mahni \heuh inzawt in, mahni ngeiin a chhanna  insiam \heuh teh ang u khai. Vawiinah hian Krista min hmangaihna avanga thihna rapthlak leh mualpho thlâk taka a tawrhnate nang leh kei avanga hmusit leh diriam taka nghaisak a tawrhna te hling lukhumte chu kan mitthlaah leh thinlungah a tharin lo lang lul teh se. Kan nunna tura a thihna chu a hluin a ropui si a.

   Pathiana thiamchanna reng neilova chhandamna chang tura felna leh \hatna reng nei tawhloten, chatuan nunna kan neih theihna tura a thihna chu a va hluin a va ropui em! A thihna chu kan nunna, a tawrhna chu kan damna, a mualphona chu kan ropuina a ni si a, Isua Krista thihna avanga chatuan nunna kan lo chan leh theihna hi a ropuiin a hlu takzet a ni. Keini a thihna avanga thuthlung ropui tak changa neitute pawhin sual kan thihsan a, Amaha kan nunna Thlarauva kan nun nan a ni tih kan hriat fo hi a \ul takzet a ni. Isua Krista kross-zarah chuan khawvel tan khenbeh a awmin khawvel ropuina leh hausakna, nawmchenna tehi kan tan khenbeh a a awm hian Kristaah chuan kan lo nung tawh zawk dawn si.

   Kan mihring nun hluite chu kross-a khengbetin Kristaah chuan tihnun a awm turin inngaitlawm a, Ama tana inhlan tur kan ni tih hi i theihnghilh lovang u. Itsîkna leh èlrêlna te, huatna leh in hmelmâkna te, kan nunah tihthihin lo awm se , chutah chuan an nunah Krista nun lo langin hmangaihna chu a par chhuakin a rimtui a lo chhuak dawn a ni.

   Sual thihsana pianthar a hun ta.. Hnunglama thilawmte chu theihnghilh mai lova, bansan a, thihsanin a duhzawng thil \ha tia kan nun hi Krista’n kross-a min tawrhsak chhan chu a ni si a.

   Kan unau, rawngbawlpuite ngaihdam an ngaihnaah in ngaidam tawn ila an tlinlohna leh an \hatlohna laite chauh sawi lovin, a tlinna leh an \hatna laite inhriat sak ila, chapona te chu tlawmna hmangin hneh ila, itsîkna leh dèmna te chu khawngaihna leh duhsakna te leh fakna hmangin hnawt bo ila, lungawi lohna te leh tauhna te, thinrimna leh huatna te chu a Thlarau thiltihtheihna leh hmangaihnain, lungawina leh lawmna hlimnain hneh ila chutah a parmawi rah duhawm tak a rahchuak ngei ang.

   I tuarna leh tlawmna ram fan,

   Ka hringnun hian a zo love;

   Mahni in phat a, i hnungzui tur hian,

   Hmangaih lal nunnem aw min hruai zel rawh.

   Tiin kan nunna tura a thihna chu kan nun tichak leh tichheltuah i hmang ang u khai, Kross-a a thihdawna ‘A kin ta’ a tih ang khan kan nuna fellohna leh \hatlohna awmte chu ‘A kin ta’ tiin hmangaih Lalpa tan kan rilru taksa, i hlan thar ang u khai, ngaihdamna ropui tak, tun damchhung atan chauh nilo chatuan atana min pek hi kross-a thihna hmanga min pek a ni si a, Ngaihdam ngai leh hriatthiam ngaia awm fo lovin, ngaihdam theitu leh dawhtheiah \ang zawk ila,

   Rinin amah ka tan ka hauh,

   Pathian fa tho leh a chu;

   A thihnaah tlanna ka hmu,

   Silfaina thisen nen.

            Tia a hming fak chung zelin kan nunna thua Krista thihna leh tahawhlehna chuan kan thinlungah hmun luahin ramtiam min hruai thleng mawlh rawh se. Lalpa’n malsawm rawh se.


9 APRIL 2012                                                                                                                 Rev. R.Laldawngliana. 

If you enjoyed this post and wish to be informed whenever a new post is published, then make sure you subscribe to my regular Email Updates. Subscribe Now!

Kindly Bookmark and Share it: